कर्णालीका हिमाली जिल्लामा मंगलबारदेखि मतगणना हुने आँकलन

सुर्खेत : कर्णाली प्रदेशका हिमाली जिल्लाहरूमा हिजो आइतबार सम्पन्न मतदान भए पनि भौगोलिक विकटताका कारण मतपेटिका सङ्कलन हुन् सकिरहेको छैन ।  सडक सञ्जाल नजोडिएको र हेलिकप्टरबाट सङ्कलन गर्नुपर्ने भएकाले अझै पनि मतपेटिका सम्बन्धित क्षेत्रमा ल्याउन नसकिएको हो ।

विशेष गरी हुम्ला र डोल्पाका अधिकांश ठाउँको मतपेटिका सङ्कलनका लागि हेलिकप्टरको प्रयोग गर्नुपर्ने अवस्था छ । हुम्लाका प्रमुख निर्वाचन अधिकारी श्याम रानाले अहिलेसम्म हेलिकोप्टर नै जिल्लामा नपुगेको जानकारी दिए । उनका अनुसार जिल्लाका नाम्खा गाउँपालिको हल्दीदाङ, तिल, सर्केगाड, चङ्खेली, ताँजाकोट अदानचुलीमा मतदान केन्द्रहरूका मतपेटिका आएका छैनन् । 

‘हेलिकप्टरबाट ल्याउनुपर्ने भएकाले अहिलेसम्म हेलिकप्टर हुम्ला पुगेको छैन,’उनले भने,‘ सुर्खेतबाट अहिले आउने भन्ने कुरा छ आएको खण्डमा आज सबै ठाउँको मतपेटिका ल्याउने काम हुन्छ र सम्भवतः भोलिसम्म मतगणना हुन्छ होला ।’ 

यस्तै डोल्पाका पनि सोही समस्या हो । हेलिकप्टरबाट छार्काताङ्सोङ से–फोक्सुन्डो, डोल्पोबुद्ध गाउँपालिकाका मतदान केन्द्रबाट मतपेटिका ल्याउनुपर्ने भए पनि अहिलेसम्म त्यहाँ हेलिकोप्टर पुग्न सकिरहेको छैन । 

डोल्पाका प्रमुख निर्वाचन अधिकारी रामबहादुर शाक्यका अनुसार सुर्खेतबाट हेलिकप्टर आए पनि मतपेटिका ल्याउने भन्ने कुरा छ । उनले पनि मंगलबारदेखिनै मतगणना सुरु हुने आँकलन गरे । 

यता मुगुमा २ दिनको बाटो हिँडेर मतपेटिका ल्याउने कार्य भइरहेको छ । मुगुका प्रमुख निर्वाचन अधिकारी विष्णु न्यौपाने जिल्लाका ग्रामीण क्षेत्रमा सडक नपुगेको र मतपेटिका बोकेर ल्याउनुपर्ने भएकाले २ दिन अझै लाग्ने बताए । ‘गाउँबाट दुई तीन दिनको बाटो छ । हेलिकप्टरबाट ल्याउने भनिए पनि अन्तिममा बोकेर पैदल यात्राबाट ल्याउनुपर्ने बाध्यता छ,’उनले भने,‘ खत्याड गाउँपालिका वडा नम्बर १० र ११ सोरु गाउँपालिकाका ९,१० र ११ वडाहरूमा गाडी चल्दैन ।’ 

उनका अनुसार छायानाथ रारा नगरपालिका बाहेकका अन्य कुनै पनि मतदान केन्द्रहरूको मतपेटिका आउन सकिरहेको छैन ।