जुम्लामा यार्सागुम्बा सहित एक जना व्यापारी पक्राउ

 सुर्खेत : जुम्लाका एक जना खुद्रा व्यापारी अवैध रुपमा जडीबुटी विक्रि वितरण गर्दै गरेको अवस्थामा पक्राउ परेका छन् । एक सय ६० पिस ५३ ग्राम यार्सागुम्बा र एक सय ग्राम सिलाजित अवैध रुपमा विक्री गर्दै हिँडेको अवस्थामा जुम्लाको सिंजा–४ का लिलाराज बुढा पक्राउ परेका हुन् ।

उनलाई जिल्ला प्रहरी कार्यालय म्याग्दीले पक्राउ गरेका हुन् । अवैध रुपमा विक्री वितरण गर्दै आएको भन्ने सुराकीका आधारमा शंकास्पद व्यक्तीलाई बेनी बजारमा भेटी खानतलासी गर्दा यार्सागुम्बा र सिलाजित भेटिएपछि पक्राउ गरेको जिल्ला प्रहरी कार्यालय म्याग्दीले जनाएको छ ।

जडिबुटी विक्री वितरण गर्ने तथा सङ्कलन गर्ने जस्ता कुनै पनि आधिकारीक कागजात नभेटिएपछि प्रहरीले उनलाई पक्राउ गरी डिभिजन वन कार्यालय म्याग्दीलाई जिम्मा लगाएको छ ।

उनलाई जिल्ला अदालतबाट पहिलो पटक सात दिनको म्याद थप गरी अनुसन्धान भइरहेको डिभिजन वन कार्यालयका प्रमुख मनोज रानाभाटले जानकारी दिए ।