एमाले कर्णाली प्रदेशको अध्यक्षमा गुलाबजंग शाहको प्यानलै विजयी

 सुर्खेत : नेकपा एमाले कर्णाली प्रदेशको अध्यक्षमा गुलाबजंग शाहको प्यानल नै निर्वाचित भएको छन् । सोमबार राति सम्पन्न मतपरिणामअनुसार शाहले ३६९ मत ल्याएर अध्यक्षमा निर्वाचित भएका हुन् । अध्यक्षका अर्का प्रत्यासी मीनबहादुर शाहीले २०७ र प्रकाश रोकायाले चार मत ल्याएका छन् ।

त्यस्तै उपाध्यक्षमा टेकराज पछाईले ३४२, सचिवमा ध्रुवकुमार शाहीले ४०६, उपसचिवमा रवीन्द्रराज शर्माले २९९ र रमेशबहादुर शाहीले २६६ मत ल्याएर विजयी भएको निर्वाचित कमिटीका संयोजक मातृका खनालले जानकारी दिए ।

सर्वसम्मत नेतृत्व चयन गर्न नसकेपछि निर्वाचन भएको थियो । आइतबार भएको मतदानमा कुल ६१६ मतदातामध्ये ६०४ मत खसेको थियो । खसेको कुल मतमध्ये ९ मत बदर भएको छ भने ५९५ मत सदर भएको हो । पदाधिकारीको मतगणना सकिए पनि सदस्यहरुको मतगणना मंगलबार बिहान सुरु हुने निर्वाचन कमिटीले जनाएको छ । १३५ सदस्यीय प्रदेश कमिटीमध्ये ४४ सदस्य सर्वसम्मत निर्वाचित हुँदा ८६ जनाका लागि मतदान भएको थियो ।