दैलेख : पेट्रोलियम पदार्थको अन्वेषण अन्तर्गत ड्रिलिङको काम ८० प्रतिशत सकिएको छ । दैलेखको भैरवी गाउँपालिका–१, जलजले क्षेत्रमा रहेको ड्रिलिङको काम सक्ने गरी चार महिनाभित्र गत जेठदेखि काम सुरु गरिएको भए पनि कडा चट्टानका कारण ८० प्रतिशत मात्र ड्रिलिङको काम सकिएको परियोजनाले जानकारी दिएको छ ।
खानी तथा भूगर्भ विभागका सिनियर डिभिजनल जिओलोजिस्ट सुरेश श्रेष्ठले चार हजार मिटर गहिराइसम्म ड्रिलिङ गर्नुपर्नेमा हालसम्म तीन हजार १२९ मिटर ड्रिलिङ भइसकेको जानकारी दिए । उनले चार महिनाभित्र काम सक्ने लक्ष्यका साथ ड्रिलिङ थालिएकोमा जमिनमुनि कडा चट्टानका कारण मङ्सिर मसान्तसम्म ड्रिलिङको काम सक्ने अनुमान गरिएको बताए । “अहिले विज्ञहरूले दुई÷दुई मिटर गहिराइबाट निस्किएका ढुङ्गा र माटो परीक्षण गरी तथ्याङ्क सङ्कलन गरिरेहका छन् । त्यसैका आधारमा सोर्स रक, रिजर्भ वायर रक र सिल रक गरी तीन वटा थप अध्ययन हुने छ,” उनले भने, “पेट्रोलियम पदार्थ हुनका लागि तय गरेका आवश्यक मापदण्ड अन्तर्गतका सङ्केत सफलतापूर्वक प्राप्त भइरहेको छ ।”
ड्रिलिङका लागि दैलेखको भैरवी गाउँपालिका–१, जलजलेमा ४५ रोपनी जग्गा अधिग्रहण गरिएको छ । हाल चिनियाँ र नेपाली गरी ७० जनाको समूहले ड्रिलिङको काम गरिरहेको छ । दैलेखको शिरस्थान, नाभीस्थान, पादुकास्थानमा तीन वर्षभित्र पेट्रोलियम पदार्थको अनुसन्धान सक्ने गरी चिनियाँ सरकारसँग सन् २०१९ फेब्रुअरी २८ मा सम्झौता भएको थियो । सुरुमा तीन वर्षभित्र तीन चरणमा काम सक्ने गरी सम्झौता भएको थियो तर कोरोना महामारीका कारण सम्झौता अनुसार काम हुन सकेन । पहिलो चरणमा चिनियाँ प्राविधिकहरूले दैलेखको स्थलगत अध्ययन गरेर पेट्रोलियम पदार्थ हुन सक्ने सम्भावित ठाउँ पत्ता लगाएका थिए ।
Post a Comment